آذربایجانین قوجامان ائولادی محمد علی فرزانه

دکتر توحید ملک زاده دیلمقانی

[e-mail]

 

ایللر اونجه دکتر نطقی نین وفاتی موناسبه تیله بیر مقاله ده بئله یازدیم:

آدام وار کی اونون اولومونه ساده جه عائله سی کدرله نیر و اؤزولور/ آدام وار کی اونون اؤلومونه بیر کند و یا شهر کدر له نیر. آدام وار کی اونون اؤلومو بیر خالقی بیر میللتی سارسیدیر، غم ایله بؤرؤیور/ نئچه گون اول وفات ائده ن دکتر محمد علی فرزانه ده بو کیمی تادیر و آز تایی اولان  مودریک اینسان لاردان بیریسی دیر. اونون انادان اولما گونلری آذربایجان تاریخینین ان حادیثه لی و چالخانتیلی گونلری ایله مصادیف ایدی: پهلوی سولاله سی الیله آذربایجان دا فارس لاشتیرما سیاستی باشلانماسی. گنج لیگی ده گینه آذربایجانین چالخانتیلی ایللرینه یعنی آذربایجان دموکرات فرقه سینین قورولوپ حوکومت قور ماسینا توش گلدی. فرزانه ائله بو قارانلیق  ایللرده پهلوی لر الی ایله یوخ اولمایا محکوم اولان آذربایجان ادبیاتی ایله مشغول اولور.نه خوش کی خالقیمیزین ادبیات آدرسی نی ان دوزگون وساغلام اولاراق تثبیت ائدیر و ایلک دعفه اولاراق شاهنامه و گولوستان د ئییل تورکلرین شاه اثری و بابالاریمیزین ایتگین میراثی ده ده قوقودو آذربایجان جوان لارینا تانیدیر. فرقه داغیلاندان سونرا شاه محکمه سینده  اونون سوچلاریندان بیریسی بو نهنگ کیتابین تانیتیمی اولموشدور. محمد علی فرزانه آذربایجان تورکجه سینین دوشمانلارینا  جواب اولارق دیلیمیزین گرامری نی یازیپ اونلارا ثبوت ائتدی کی بیزیم دیلیمیز نه اینکی یاد دیللرده ن هئچ ده اسگیک ده ییل بلکه یاپی باخیمدان دونیا دیللرینین ان گراماتیک دیللرینده ن بیریسیدیر. اونون فولکلور دا ایسه الی وارایدی. خالقیمیزین میراثی ساییلان فولکلور خزینه میزین بایاتی بولومونو ان سانباللی بیچیمده آراشتیریپ وچاپ ائتدی. نه یازیق کی یاد اولکه لرده اونون خاطیری داها عزیز ایدی. اونون علمی چابالاری نتیجه سینده اسکاندیناویا اؤلکه لری  فرزانه نی مملکت لرینین فخری یازارلار بیرلیگی نه قبول ائتسه لر ده اوز دوغما مملکتینده  اونا مکمل شکیلده فعالیت ساحه سی یارادیلمادی و نهایت مملکتی ترک ائتمه گه مجبور اولدو. بورادا اونون حیات یولداشی اولان اختر خانیم دان سوز ائتمک هئچ ده یئر سیز ده ییل. فرزانه عائیله سی ایله اوتوروپ دورانلار محمد علی فرزانه نین یانیندا همیشه اونون حیات یولداشی اختر خانیمی گوروردولر. دوکتور فرزانه نین قایغی لارینین  بویوک قیسمینی اوستونه الان بو زحمتکش آنامیز دوکتورون ال یازمالارینی سهمانلایان و اونلاری دوزگون رئداکته ائده ن اولموشدور .بو خانیمدان تشکور ائتمک هر بیر آذرباجانلی نین وظیفه سی دیر.

من بو کدرلی حادیثه نی آذربایجان خالقی نا و فرزانه عائله سینه باش ساغلیغی وئریب آذربایجانیمیزده داها چوخ فرزانه لرین بویا باشا چاتمالارین ایسته ییره م. یئری بهشت اولسون.